香港電影金像獎觀後感

總算在四月趕得起Jnk Film Awards，就算之前用左幾多時間都冇所謂。在剛剛過左既禮拜日，我期待左好耐既香港電影金像獎終於來臨，雖然冇上個月既Academy Awards咁吸引，但係都算係唔錯，可能同個轉播電視台有關。我想在這裡，就今次既頒獎典禮講少少感想。

一反常態，今屆一開場就頒左最佳新演員先，仲要請晒所有既候選人上台，在頒獎前講下野，我覺得有少少拖時間之嫌。另外，曾志偉同錢嘉樂有d胡言亂語，在搞氣氛上有些少失敗，然而最大驚喜係宣佈得獎者既時刻，因為唔知邊個男演員會拎，最後由去年樂壇新人李治廷憑《歲月神偷》奪得此項殊榮，很明顯地飾演弟弟既鍾紹圖難掩失望之情，希望佢唔會因此放棄。

賽前被視為「無競爭」既項目有幾個，當中新晉導演都算係冇得鬥，因為《音樂人生》既為紀錄片，但口碑極好，而《明媚時光》既翁子光都唔錯，不過風頭被張經緯蓋過，佢亦當之無愧。此項目最離奇既係竟然連《殺人犯》既周顯揚都入圍，令人匪夷所思。

在兩個幕後獎之後，就到左最佳女配角。在提名人當中，惟獨只有《意外》既葉璇同埋《赤璧 決戰天下》既趙薇有機會初嚐最佳女配角既滋味，但係評審主要係香港既電影工作者，當然想香港演員拎到啦。我個人而言，都覺得頒俾葉璇係最好不過，首先佢真係做得比較好，然後佢在電影界既資歷都幾深，在大約四至五年既電視圈經驗之後，就轉戰大銀幕，由唔起眼既小角色到今日既配角王后，都應該輪到佢。

近幾屆都興起一種類型既片種，就係講述香港情懷既電影。上一屆有《天水圍的日與夜》，今屆就有《天水圍的夜與霧》同最佳編劇得主《歲月神偷》。我記得個劇本係根據羅啟銳先生既童年而寫，其實上一代既觀眾睇完一定有共鳴，況且現今鼓吹保留舊有既地方，呢個劇本拎都不足為奇。

到左男配角，基本上都唔洗睇得獎信封，都知謝霆鋒一定會拎到，因為佢未試過在金像獎拎過任何獎，而且佢亦在電影圈捱左一段日子，甚至為左電影，放棄繼續音樂事業，佢既犧牲都唔少，呢個獎對佢來說，可算是「遲來的春天」。

影帝方面，大熱既王學圻在《十月圍城》既演出其實係五個候選單位最好既，但係情況有少少似Academy Awards既影后一樣，得獎人都唔係五個候選單位中最好既，只係評審想佢地贏。不過任達華都冇功有勞，拎到有大部分只係同情。

至於影后方面，外界都只揣測《心魔》既惠英紅同埋《歲月神偷》既吳君如，不過始終係「薑越老越辣」，我自己都幾支持佢捧獎，希望佢可以有一個更好既事業發展。